Grupi Mabetex, në pronësi të Behgjet Pacollit, pretendohet se është përfshirë në përpjekje për të ndikuar zhvillimin e protestës së të rinjve shqiptarë, e cila ka hyrë në javën e katërt.

Sipas burimeve të cituara, përfshirja e pretenduar lidhet me interesat e kompanisë në konfliktin mes partnerëve të konsorciumit që fitoi në vitin 2021 koncesionin për ndërtimin e Aeroportit të Vlorës. Raportohet se mosmarrëveshjet brenda konsorciumit kanë sjellë vonesa në zbatimin e projektit, duke rritur mundësinë e marrjes së masave nga autoritetet shqiptare.

Po sipas këtyre burimeve, Mabetex pretendohet se ka financuar dhe mbështetur grupe që veprojnë në Shqipëri, Kosovë dhe diasporën shqiptare, me synimin për të ndikuar zhvillimin e protestës.

Gjithashtu, burimet pretendojnë se përfaqësues të Grupit Mabetex kanë tentuar të ushtrojnë presion ndaj Kryeministrit Edi Rama, duke ofruar qetësimin e situatës së krijuar nga protestat në këmbim të mbështetjes së qeverisë shqiptare në konfliktin mes partnerëve të konsorciumit dhe të mosndërmarrjes së masave ndëshkuese për vonesat në përmbushjen e detyrimeve kontraktore.