Kosova ka hyrë në fazën kritike të zgjedhjes së kreut të shtetit. Sipas afatit të prerë nga Gjykata Kushtetuese, procesi duhet të përmbylet deri më 28 prill, ose në të kundërt, vendi do të detyrohet të shkojë në zgjedhje të parakohshme parlamentare brenda 45 ditëve.

Prapaskenat e negociatave: VV drejt LDK-së

Deri më tani, një marrëveshje konkrete mes forcave politike ende mungon. Megjithatë, lëvizjet në prapaskenë janë intensive. Lëvizja Vetëvendosje, si fituese e zgjedhjeve të fundit, po i përqendron shpresat te një dakordësi me LDK-në. Me 15 vendet e LDK-së dhe 66 mandatet e koalicionit qeverisës, numri i votave do të shkonte në 81, duke siguruar kuorumin e nevojshëm prej 80 votash në Parlament.

Gatishmëria për tërheqje dhe roli i opozitës

Glauk Konjufca, një nga emrat e propozuar nga Albin Kurti, ka lënë të kuptohet se mund të tërhiqet nga gara nëse gjendet një kandidat konsensual që do të bashkonte spektrin politik.

"Zgjedhja e presidentit është në dorë të opozitës. Nëse ata nuk bashkëpunojnë, zgjedhjet e reja janë të pashmangshme," u shpreh Konjufca.

Nga ana tjetër, ndërsa LDK-ja përmes Lutfi Hazirit ka konfirmuar konsultimet me VV-në, PDK-ja mbetet jashtë procesit. Vlora Çitaku ka bërë të ditur se ende nuk ka një ftesë zyrtare për bashkëpunim nga ana e Kryeministrit Kurti.

Thirrja për stabilitet nga Presidenca

Ushtruesja e detyrës së Presidentes, Albulena Haxhiu, ka bërë thirrje urgjente për unitet gjatë kësaj jave, të cilën ajo e konsideron vendimtare. Ajo theksoi se kriza e re politike nuk i shërben interesave të Kosovës, sidomos përballë sfidave të brendshme dhe ndërkombëtare.

“Nëse ekziston vullneti politik, marrëveshja mund të arrihet brenda pak orësh,” deklaroi Haxhiu, duke i inkurajuar partitë t’u përgjigjen ftesave të Kurtit për dialog./NextShqip