Kreu i Grupit Parlamentar të Partisë Socialiste, Taulant Balla, ndodhet në Bruksel ku po zhvillon takime në Parlamentin Evropian. Përmes një postimi në rrjetet sociale, Balla thekson se Shqipëria po hedh hapa të sigurt drejt anëtarësimit në Bashkimin Evropian dhe se procesi i negociatave ka hyrë në një fazë vendimtare.

Sipas Ballës, reformat e ndërmarra nga qeveria shqiptare, veçanërisht ajo në drejtësi, kanë marrë vlerësime maksimale nga partnerët evropianë. Ai shton se rruga e Shqipërisë drejt BE-së është tashmë "pa kthim pas" dhe se mbështetja e Parlamentit Evropian është kyçe në këtë proces.

"Në Parlamentin Evropian për të rikonfirmuar mbështetjen e palëkundur të grupeve politike ndaj rrugëtimit evropian të Shqipërisë. Negociatat janë në një fazë teknike dhe politike tejet rëndësishme. Shqipëria ka treguar vullnet të qartë për të përmbushur çdo kriter, duke u pozicionuar si një faktor stabiliteti në rajon," u shpreh Balla.

Gjatë qëndrimit në Bruksel, Balla do të zhvillojë takime me eurodeputetë të grupeve të ndryshme politike për të diskutuar mbi ecurinë e procesit të "screening" dhe hapat e radhës që duhen ndërmarrë për hapjen e kapitujve të parë të negociatave.