Ervin Salianji ka lëshuar kritika të ashpra ndaj lidershipit të Partisë Demokratike dhe kryetarit Sali Berisha, gjatë një takimi me strukturat dhe demokratët në qytetin e Kukësit. Salianji vuri në pikëpyetje të ardhmen e opozitës, duke theksuar se me formatin aktual, fitorja mbetet një mision i pamundur.

"Berisha është dorëzuar, nuk ka fitore pa ndryshim"

Sipas Salianjit, Partia Demokratike po dështon në misionin e saj kryesor: bashkimin e frontit opozitar dhe hapjen ndaj qytetarëve.

"Është treguar që Berisha nuk e hap partinë, nuk e bashkon opozitën, nuk i bashkon dot njerëzit dhe ai vetë është dorëzuar. Nuk mund të fitojmë dot kurrë nëse nuk ndryshojmë", tha ai prerë përpara demokratëve kuksianë.

Dilema e 800 mijë votave dhe roli i SPAK

Deputeti demokrat u ndal edhe te paaftësia e kupolës drejtuese për të mobilizuar elektoratin, duke bërë një krahasim të fortë me punën e Prokurorisë së Posaçme.

• Për elektoratin: "Pyetja që shtrohet për drejtuesit e PD është: si do t’i çojmë më shumë se 800 mijë demokratë në kutitë e votimit kundër pushtetit të Edi Ramës?"

• Për aksionin opozitar: "I thonë shqiptarëve çdo javë është kilometri i fundit... Opozitë po bën më shumë SPAK-u se PD", deklaroi Salianji, duke ironizuar retorikën e deritanishme të partisë.

Thirrje për garë: "Të mundim autokratët e opozitës"

Salianji e lidhi zinxhirin e humbjeve që nga viti 2013 me faktin se drejtuesit aktualë refuzojnë të lëshojnë karriget. Ai i bëri një thirrje direkte Sali Berishës për t'u përballur në një proces të hapur votimi.

"Kam një thirrje të sinqertë për drejtuesit dhe zotin Berisha: dil dhe përballu në garë. Jepi mundësinë demokratëve të shprehen e të votojnë. Shqiptarët kanë kuptuar një gjë: që të mundet autoritarizmi i qeverisë, duhet të munden autokratët e opozitës", përfundoi ai./NextShqip