Reforma zgjedhore është rikthyer sërish në qendër të debatit politik në vend, me sinjale për hapje dialogu mes mazhorancës dhe opozitës.

Përfaqësues të mazhorancës kanë deklaruar se janë të gatshëm të ulen në tryezë me palën tjetër politike për të diskutuar ndryshime të mundshme në sistemin elektoral. Sipas tyre, çdo reformë në këtë drejtim kërkon patjetër ndryshime kushtetuese dhe nuk mund të realizohet pa një dakordësi të gjerë politike.

Në fokus të diskutimeve pritet të jenë jo vetëm modelet e sistemit zgjedhor, por edhe çështje që lidhen me organizimin e Kuvendit, përfshirë edhe numrin e deputetëve.

Palët politike pritet të vijojnë konsultimet në ditët në vijim për të përcaktuar formatin e një tryeze të mundshme dialogu mbi reformën zgjedhore.